AZAROAREN 25a

 Atzo Azaroaren 25a, Emakumeen kontrako indarkeriaren aurkako nazioarteko eguna zela eta, herriko plazan elkartu ginen emakumeak jasaten duten indarkeria salatzeko. Eskolan ere landu genuen gaia eta gure mezuak idatzi genituen globoetan.

AZTERKOSTA

 Urtero legez "Azterkosta" ekintza egitera joan ginen Ogeiara. HH 4-5 eta LHko lagunak joan ginen. Hondartza eta goiko merenderoa garbitu eta ur laginak hartu genituen gero gelan analizatzeko. Ogeia hondarrez beteta aurkitu genuen eta oso pozik ibili ginen.

SAN MARTIN EGUNA

 Ohitura dugun bezala, azaroaren 11an San Martinera egin genuen txangoa. Han bertako elkartekoek gaztaina erreak prestatu zizkiguten. Oso-oso onak zeuden. Goiz ederra pasatu genuen.

GABA BALTZA

 Pasa den Urriaren 30ean "Gaba Baltza" edo "Arimen Gaba" ospatu genuen eskolan. Goizean tailerrak eta jolasak izan genituen eta arratsaldean kalabaza hustuketa. Hurrengo egunean kalabazak herrian zehar jarri genituen. Oso egun polita izan zen.

GALTZAGORRI

 Aurten ere Galtzagorrikoen bisita izan dugu eskolan. Galtzagorri Elkarteko Oihanak pilo bat liburu polit ekartzen dizkigu eskolara. Hiru-lau kontatzen dizkigu eta denak eskolan uzten ditu guk gero etxera eraman ahal izateko. Oso ipuin politak kontatu zizkigun!

HH GARRAIOAK

 Kaixo, kaixo!

HHko ikasleak "GARRAIOAK" landu dituzte. Oso ondo pasatu dute. Suhiltzaileen kamioia etorri zen eskolara eta anbulantzia ere bai. Asko ikasi dute eta primeran ibili dira. Hemen bideotxoa:

HABITAT EGUNA

 Pasa den Irailaren 30ean HABITAT EGUNA ospatu genuen eskolan. Eskola ingurua garbitzera joan ginen denok. Zaborra batu eta gero sailkatu egin genuen ikusteko zenbat zabor eta zein motatakoa botatzen dugun lurrera. Behin sailkatuta zabor guztia dagokion edukiontzietara bota genuen. Horrelako ekintzek kontzientzia hartzeko balio digute.

KILOMETROARI BUELTA BIZI ELKARTEKOEKIN

 Pasa den eguenean, irailaren 19an "Kilometroari" buelta emon genion Bizi Elkartekoekin batera. Paseotxoa egin ostean elkartera joan ginen eta han Bizi Elkarteko kideek prestatutako merienda goxoa jan genuen. 

Eskerrik asko bihotz-bihotzez!

AZKEN EGUNEKO JOLASAK

 Ekainaren 21ean agur esan genion ikasturteari. Aurten "ur-guda" egiteko asmoa geneukan baina eguraldiak ez zigunez lagundu, goizean jolasak egin genituen frontoian. Primeran pasatu genuen.

EAko HONDARTZA ETA IBAIALDE.

 Ekainaren 17an txangoa egin genuen Ea-ra. HHkoak hondartzara joan ginen zuzenean eta LHkoak ibaia garbitzera joan ziren "Ibaialde" ekintza burutzeko. Hori bukatuta hondartzara etorri ziren HHkoekin elkartzera.

UDAL FOROA.

 Ekainaren 14an Udal Foroa izan genuen liburutegiko goiko gelan. Alkatearekin elkartu ginen Agenda 30ean egindako lanak aurkezteko, gure eskaerak egiteko eta beste hainbat gairi buruz hitz egiteko. Horren ostean hameiketako osasungarri eta goxoa eskaini ziguten.

BIZI ELKARTEKOEKIN YOGURTAK EGITEN. HH-LH

 Ekainaren 13an, arratsaldez, Bizi Elkarteko lagunekin yougurtak egin genituen beraien txokoan. Oso gustura ibili ginen beraiekin. Hurrengo egunean Udal Foroaren ostean jan genituen yogurtak.

ARRAGUARA BISITA. HH

 Ekainaren 13an Arragua espaziora egin genuen bisita. Hango instalazioetan jolastu ginen eta eguraldi eder-ederra zegoenez urarekin ere txipli-txapla ibili ginen. Goiz zoragarria pasatu genuen.

BIZKAIKO ESKOLA TXIKIEN TOPAKETA

 Ekainaren 7an Bizkaiko Eskola Txikien Topaketa egon zen Zugastietan. Hantxe elkartu ginen beste eskoletako HH eta LH1-2ko ikasleekin. Egun eder-ederra pasatu genuen.

SCAVENGER HUNT. LH 3-4

 LH 3-4.mailako ikasleak jarraibideak landu dituzte Inglesean. Praktikan jartzeko "Altxorraren bila" egin dugu herrian zehar.